Një ditë pas arrestimit të katër personave të dyshuar si pjesë e bandës së Qafë - Kasharit, policia e zhvendosi operacionin në zonën e Dibrës, në kërkim edhe të dy të dyshuarve të tjerë të grupit që janë ende të lirë, Admir Murataj dhe Admir Çerpja.<br /><br />Veç tyre, Policia dyshon se pjesë e grupit janë së paku edhe dy persona të tjerë, të cilët gjithashtu janë shpallur në kërkim.<br /><br />Forca RENEA, ato të Ndërhyrjes së Shpejtë dhe Njësia Operacionale e Policisë së Shtetit kontrolluan dhjetëra banesa në Zall Dardhë, Can, Tartaj dhe Lashkizë, duke krehur imtësisht zonën, ku dyshohet se strehohen dy të kërkuarit. <br /><br />Më herët, policia ka kryer kontrolle edhe në zona të tjera të Tiranës, me qëllim arrestimin e të kërkuarve.<br /><br />Kreu i grupit, që ka autorësinë për grabitjen e 3.8 milionë dollarëve, më 3 Dhjetor të vitit 2015 dhe 3.2 milionë dollarëve më 9 Shkurt, në dy ngjarje të ndodhura në rrugën e Rinasit, dyshohet të jetë Admir Murataj, ky që po shihni në këtë foto.<br /><br />Admir Murataj është i njohur për Drejtësinë. Ai është një prej grupit të 11 shqiptarëve që u arratisën nga burgu i Trikallës në Greqi, më 16 Mars të vitit 2013.<br /><br />Grupi që kishte në krye Ilir Kupën, i cili gjendet në burg si kreu i "Bandës së Babagjyshëve", përgjegjës për disa grabitje dhe vrasje, akuzohej për grabitjen e bankës së Larisës, ku u morën 1 milionë euro.<br /><br />Gazeta "Kathimerini" shkruante në atë kohë se, autorët e grabitjes ishin Admir Murataj dhe Klement Gala, të cilët e kishin sulmuar bankën me një pistoletë dhe një kallashnikov, por pa maska.<br /><br />Ai dyshohet edhe për grabitje të tjera dhe për vrasje të kryera në Greqi, si pjesë e një grupi të strukturuar kriminal. Në vendin fqinj kishte përdorur 15 emra të ndryshëm.<br /><br />Televizioni Klan ka mësuar se i kërkuari tjetër është Admir Çerpja, nga Dibra. Burime nga grupi hetimor bëjnë me dije se Admir Çerpja kishte lidhje të drejpërdrejta me Neim Avdulajn, i cili e vizitonte shpesh atë në Dibër, siç tregon kjo foto e bërë në Mars të vitit 2016.
